Koreana tumalon mula 18th floor, lasog

Tumalon mula sa ika-labingwalong palapag ng condo­minium ang isang Koreana  na naging sanhi ng kanyang kamatayan kahapon ng madaling-araw sa Malate, Maynila. Kinilala ni Det. Jonathan Bautista ng Manila Police District-Homidice division ang biktima na si Min Young Bu, isang Korean national na nag-aaral sa Uni­versity of Manila.

Ang naturang Koreana ay tumalon mula sa kanyang condominium unit  sa 18th Floor  ng Baywatch Tower sa M.H.Del Pilar  St., Malate dakong alas-4 ng madaling-araw kahapon. Sa ulat ni Bautista, tinangka pa umanong pigilan ng mga kaibigan ng biktima na nakilalang sina Jou Mi Hye at Jeong Soon Lee ang gina­wang pagtalon nito sa veranda ng kanilang unit  ngunit hindi ito nagpapigil.

Lumalabas din sa inisyal na imbes­tigasyon ng pulisya na posibleng mas pinili na lamang umano ng biktima na magpakamatay dahil sa  nahihira­pan umano ito sa kinukuhang kursong executive ma­nage­ment. Sa ibinigay na pahayag sa pulisya ng mga nabang­git na kaibigan ng biktima, maaaring nagpaka­matay umano ito dahil sa umano’y maltreatment na nararanasan nito.

Hindi naman inilahad ng mga ito kung anong uri ng pag­ma­maltrato ang nararanasan ng biktima. Maging ang security ng nasabing gusali ay rumesponde rin upang pigilan ang pagpapakamatay ng biktima ngunit hindi na nila ito naabutan.

Gayunman, tinangka umano ng ilang kawani ng Korean Embassy  na kunin ang bangkay ng biktima ngunit hindi ito ibinigay ng pulisya dahil magsa­ sagawa pa umano nang malalimang imbestigasyon upang matiyak na walang foul play na naganap sa insidente. (Grace dela Cruz)