Habambuhay sa 2 holdaper

Habambuhay na pagkaka­bilanggo ang inihatol kahapon ng Pasig Regional Trial Court (RTC) sa dalawang holdaper na pumatay sa isang   call center agent ng kanila itong barilin sa FX taxi matapos tu­mangging ibigay ang cell­phone isang taon na ang naka­kalipas sa nabanggit na lungsod.

Bukod sa habambuhay na pagkakabilanggo, inatasan din ni Judge Amelia Manalastas ng Pasig RTC Branch 268 ang mga suspect na sina Ryan Corcuera at Rodolfo Barto­lome na magbayad ng kabu­uang halagang P500,000 moral at civil damages sa pa­milya ng biktimang si Charlene Santos, residente ng Cainta, Rizal, UP student at nagta­trabaho bilang call center agent  sa Ortigas, Pasig.

Base sa rekord  ng korte, naganap ang krimen noong Abril 2, 2006 ng gabi sa ka­habaan ng Brgy.  Rosario ng lungsod na ito nang holdapin ng tatlong kalalakihan kabilang ang dalawang nahatulang suspect ang isang FX Taxi na kinalululanan ng pitong pa­sahero kabilang ang nasawing biktima.

Matapos na maglabas ng baril at nagdeklara ng holdap ay isa-isang kinuha ng mga sus­pect ang mga maha­hala­gang gamit ng mga pasa­hero subalit ng si Santos na ang kukuhanan ng cell­phone ay nakiusap itong kukunin lang niya ang sim card nito dahil maraming importanteng con­tact number ang nandoon.

Dahil dito nagalit ang isa sa mga holdaper at binaril sa likurang bahagi ng ulo ang biktima gamit ang kalibre .45 baril at saka kinuha ang cell­phone nito sabay nagsi­takas sa magkakahiwalay na lugar.

Kinilala naman sa ipina­kitang rogue gallery ng pulisya sina Corcuera at Bartolome na positibong kinilala ng mga saksi na   mga pasahero rin sa   hinoldap na FX Taxi.

Naaresto naman sa isina­gawang magkahiwalay na follow-up operation ng Pasig police ang dalawang suspect. (Edwin Balasa)