‘Martial Law’ sa Metro?

Martial law na nga ba sa Metro Manila?

Ito ang kuwestiyon ng mga progresibong  militan­teng gru­po kasunod ng naka­ takdang pagde-deploy muli ng mga tauhan ng AFP-Na­tional Capital Region Com­mand (AFP-NCRCOM)  ng daan-daang mga sundalo sa 14 kritikal na lugar par­tikular na sa mga slum areas sa Metro Manila sa loob ng linggong ito.

Ito’y matapos ang pagpa­pa­tupad ng anti-terror law nitong linggo upang durugin ang mga teroristang grupo at mga rebeldeng New People’s Army (NPA) na nagka­kan­long at nagre-recruit sa mga slum areas sa Kamaynilaan.

Nauna nang  pagpapa­kalat ng may 100 tropa ng militar sa Quezon City at Taguig City  na inayunan naman ng mga opisyal sa nabanggit na mga lungsod.

Ayon kay  AFP-NCRCOM Chief, Major Gen. Ben Dolor­fino, ang desisyon ay alinsu­nod sa kahilingan ng mga opisyal ng barangay na nais ang presensya ng mga sun­dalo sa Metro Manila.  Sinabi nito na sa kasalukuyan ay isinasapinal na ang pagpapa­kalat muli ng tropa ng militar kung saan nakikipag-ugna­yan na sila sa mga alkalde ng lungsod.

Sinabi ni Dolorfino na ang mga sundalo ay ide-deploy sa 14 pang lugar sa Maynila upang tumulong sa pagbi­bigay seguridad sa mga resi­dente nito matapos namang maisa­pinal na ang anti-terror law noong linggo.

“Sinigurado nating ito ay may consent ng city mayors. Sini­gurado natin yan pati sa PNP, we made sure coordi­nated yan down to the station level,” dagdag ni Dolorfino.