Kapwa nasawi ang isang negosyanteng Tsinay at ang tsuper nito matapos na pagbabarilin ang mga ito ng anim na mga hindi nakikilalang mga kalalakihan habang sakay ang mga ito ng dalawang motorsiklo kahapon ng umaga sa lungsod Caloocan.
Parehong nasawi habang nilalapatan ng lunas sa Manila Central University (MCU) Hospital sanhi ng tinamong mga tama ng bala ang mga biktimang sina Teresita Li-Chua, 54, biyuda at Secretary ng Manila Plastic Company ng #47 C-Atis Road, Governor Pascual, Malabon City at driver nitong si Romeo Romolin y Castillo, 39- anyos, #164 General Simon St., Caloocan City.
Ayon kay P/Chief Insp. Domingo Alminiana, team leader ng Scene of the Crime Operatives (SOCO) ng Northern Police District (NPD) naganap ang insidente dakong alas- 9:35 kahapon ng umaga, lulan ang mga biktima ng kulay green na Sport Runner na Toyota Revo na may plakang WEN -666.
Tinatahak ng mga biktima ang kahabaan ng General Simon St., sa Caloocan City ng harangin ang mga ito ng dalawang motorsiklo lulan ang tig-tatlong mga suspek at pinaulanan ng putok ang sasakyan ng mga biktima.
Sa inisyal na report, posibleng balak holdapin ng mga suspek ang biktima, subalit naalarma at tumakas na lamang ang mga suspect dahil sa dami ng tao sa lugar.
Habang isinusulat ang balitang ito ay patuloy pa rin iniimbestigahan ng mga awtoridad ang tunay na motibo sa naturang insidente. (Lordeth Bonilla)