Taguig pinakamalinis na lungsod

Isang 10-year solid waste management program ang binalangkas ni Taguig City Mayor Freddie Tiñga upang isulong ang adhikaing maging Pinakamalinis na Lungsod ang Taguig sa Pilipinas. Sinabi ni Mayor Tiñga na ia-upgrade ng lokal na pamahalaan ang solid waste management system ng lungsod kung saan ipatutupad ang mas maayos at epektibong paghakot ng basura sa pamamagitan ng containerized at mechanized garbage collection.

Sa bisa ng City Ordinance No. 28 series of 2006, ang paglalagay ng ilang mobile garbage bins at technology transfer ay bahagi ng 10-taong programa sa basura ng lungsod. "Ang programa ay bilang pagsunod sa itinatadhana ng R.A. 9003 o ang Solid Waste Management Act sa hangarin namin maging pinakamalinis na lungsod sa buong Pilipinas ang Taguig," sabi ni Mayor Tiñga. Sa kasalukuyan, ipinatutupad na ng pamahalang lungsod ang ikalawang Yugto ng programa kung saan ang mga dating dump trucks ay unti-unti nang pinapalitan ng mga compactor trucks na may kapasidad na mag-angat ng garbage bins. Mahigit 14,000 segregation bins ang nakatakdang ipamahagi sa 18 barangay upang ipakalat sa buong Taguig at maayos na mahakot nang hiwalay ang mga basura.