$1-M hingi ng kidnaper ng 8 Pinoy sa Nigeria

Humihingi umano ng $1 milyon ang mga rebeldeng Nigerian kapalit ng paglaya ng walong manggagawang Pilipinong kinidnap nila sa isang construction site sa Port Harcourt, Nigeria noong nakaraang linggo.

Ito ang nabatid kay Nora Dollesin na ang asawang si Lowell ay kabilang sa mga trabahador ng Daewoo Engineering and Construction Co. na dinukot ng mga rebelde sa naturang bansa.

Sinabi ni Dollesin na tinawagan siya ng kanyang asawa noong Sabado ng gabi para sabihing humihingi ng $1 milyong ransom ang mga kidnaper.

Nakarating na rin sa Department of Foreign Affairs na ginugutom at binubugbog ng mga kidnaper ang mga biktima sa pinagtataguang kagubatan. Bukod dito, kulang din sa tulog ang mga bihag. (Joy Cantos)