LRTA ninakawan ng sariling bodegero

Inutos kahapon ni Light Railway Transit Authority Administrator Melquiades Robles ang pagsasampa ng kaukulang kaso laban sa isa nilang warehouseman na nahuling nagpupuslit ng materyales na gamit sa pagpapatakbo ng motor at aircon ng tren.

Kasong qualified theft ang isasampa ng legal department ng LRTA laban kay William Ramo, nakatalaga bilang bodegero sa depot ng naturang kompanya sa Pasay City matapos mahuli sa aktong ipinupuslit ang isang pirasong carbon brass na nagkakahalaga ng P8,000.

Nagsisilbi umanong tagabigkis ng daanan ng kuryente ang carbon brass upang mapatakbo nito ang motor at aircon ng mga tren.

Ibinalot ni Ramo sa dala niyang jacket ang ninakaw na gamit at isinilid sa dalang bag noong Huwebes subalit nasita siya ng mga alertong security guard. (Rose Tamayo-Tesoro)