Dakong alas-4:30 ng hapon nang pasukin ng mga suspect na armado ng mga kalibre .45 baril, Uzi pistol at armalite rifle ang Bank of the Philippine Islands sa loob ng isang kilalang mall sa Fairview. Sinamantala umano ng mga suspect na papasara na ang banko nang looban nila ito kung saan sinipa at pinalo sa ulo ang nag-iisang guwardiya sanhi upang mawalan ito ng malay. Dumiretso ang mga suspect sa counter ng banko at nilimas ang laman ng drawer. Hindi naman nabatid kung nabuksan ng mga suspect ang vault ng banko.
Mabilis na tumakas ang mga suspect sakay ng isang Toyota Revo na may plakang XJT-421 at isang silver na Hyundai van na may plakang WAX -977. Patuloy pa rin ang isinasagawang follow-up operation ng pulisya ukol dito. (Danilo Garcia)