Taxi driver hinoldap na, sasakyan tinangay pa

Muli na namang nakaiskor ang mga notoryus na holdaper sa lungsod ng Pasig makaraang holdapin ng mga ito ang isang taxi drayber at tangayin pa ang minamanehong sasakyan, kahapon ng madaling araw sa nasabing lungsod.

Dumulog sa himpilan ng Pasig police ang biktimang si Rogelio Ticman drayber ng Basic Taxi na may plakang TWX-643 upang iulat ang pagkakaholdap at pagtangay ng kanyang dalang taxi. Nabatid kay Ticman na dakong alas-3 ng madaling-araw ay sumakay sa kanyang taxi sa kahabaan ng EDSA sa Mandaluyong ang mga hindi pa kilalang mga suspect at nagpahatid ng Pasig.

Pagdating nila sa kahabaan ng Ortigas Center ay naglabas ng maiikling kalibre ng baril ang mga suspect at nagdeklara ng holdap. Nilimas ng mga ito ang P2,000 magdamag na kinita ng biktima subalit pati ang minamanehong taxi nito ay hindi rin pinatawad at tinangay na rin ng mga suspect. (Edwin Balasa)