Namatay noon din ang biktima na si Jeneta Tolentino, 35, ng 260 Dulong Tangke, Brgy. Malinta, bunga ng matinding pinsala sa katawan samantalang binawian ng buhay habang ginagamot ang mister nito na si Joselito, 58, sa Jose Reyes Memorial Hospital.
Kasalukuyan ding nilalapatan ng lunas sa naturang pagamutan ang iba pang biktima na sina Michael Aguilar, 25, binata, driver; Jeffrey Gastalla, 19, may-asawa, kapwa ng Dulong Carnation St., Brgy. Malinta; at Bernard Bautista, 26, may-asawa ng #41 Bernardo St., Sumilang Subd., Brgy. Dalandanan, sa lungsod.
Arestado naman ang nakabanggang driver ng Toyota Corolla na si Eugene Tuazon, 27, may-asawa, ng 48 Bernabe St., Brgy. Dalandanan sa lungsod.
Ayon sa ulat, alas-2 ng madaling-araw nang mangyari ang sakuna sa kahabaan ng MacArthur Highway, partikular sa harap ng Kalahi Funeral services sa Karuhatan.
Sinasabing sakay ng isang tricycle na minamaneho ni Aguilar sina Gastalla at mag-asawa bilang mga pasahero patungong Karuhatan nang biglang salpukin ng rumaragasang Toyota na minamaneho naman ni Tuazon patungong Dalandanan. Sakay ni Tuazon ang biktimang si Bautista nang mangyari ang insidente. Sa malakas na pagkakasalpok ay nagkayupi-yupi ang harapan ng kotse pati ang tricycle na nagresulta sa pinsalang natamo ng mag-asawa at iba pang biktima. (Ellen Fernando)