Nangangaroling: Paslit, pisak sa 10-wheeler truck

Patay ang isang 4-anyos na batang lalaki nang masagasaan ng isang 10-wheeler truck habang nangangaroling kamakalawa ng gabi sa Marikina City.

Dead on arrival sa Amang Rodriguez Medical Center ang biktimang si Kim Jay Ducta, ng no. 663 Libis St. Brgy. Concepcion Uno ng nabanggit na lungsod.

Agad namang nadakip ang driver ng truck na si Justo Dionisio, 43, ng Brgy. Dulong Bayan, San Mateo, Rizal.

Ayon kay SPO2 Rizal Picayo, Traffic Enforcement Unit ng Marikina, naganap ang insidente dakong alas-7:15 ng gabi sa kahabaan ng J.P. Rizal St. kanto ng E. Gonzales, Brgy. Concepcion.

Nabatid na nangangaroling ang biktima kasama ang iba pang kaibigan nang biglang araruhin ng truck na may plakang TCH-250 hanggang sa pumasok sa ilalim nito.

Sasampahan naman ng reckless imprudence resulting to homicide ang suspect at pansamantalang nakapiit sa Marikina detention cell. (Edwin Balasa)