12 PNP official binalasa

Labing-dalawang matataas na opisyal ng Philippine National Police (PNP) ang itinalaga sa kanilang mga bagong posisyon kaugnay ng ikatlong bugso ng rigodon sa organisasyon.

Ayon kay PNP Chief Director General Oscar Calderon, ang panibagong reorganisasyon sa hanay ng mga opisyal ng PNP ay kaugnay ng pagreretiro ngayong taon ng mga nakatalaga sa key positions sa Directorial Staff, Police Regional Offices at National Support Units.

Ang panibagong rigodon sa huling bahagi ng taon ay alinsunod sa rekomendasyon ng mga Senior Officers Placement and Promotion Board (SOPPB) na pinamumunuan ni Deputy Director General Avelino Razon Jr., Deputy Chief of Administration.

Kabilang sa mga nakatalaga sa bagong posisyon ay sina Chief Supt. Charlemagne Alejandrino, Acting Director for Plans; Chief Supt. Andres Caro II, Acting Regional Director, Police Regional Office (PRO) II; Chief Supt. Pedro Tango, Acting District Director ng Northern Police District; Chief Supt. Roberto Rosales, Acting District Director ng Southern Police District; Sr. Supt. Fidel Cimatu Jr., Acting Deputy Director for Plans; Sr. Supt. Raul Castañeda, Acting Deputy Director ng Criminal Investigation and Detection Group; Sr. Supt. Orlando Mabutas, Acting Executive Director, Directorate for Human Resource and Doctrine Development; Sr. Supt. Rolando Anoñuevo, Acting Deputy Director ng Intelligence Group at Acting Task Force Commander ng Task Force Sanglahi; Sr. Supt. Edwin Corvera, Deputy Task Force Commander ng Anti-Illegal Drugs Special Operations Task Force at Sr. Supt. Atilano Morada, Acting Director, Aviation Security Group.

Samantala, sina Director Rodolfo Tor, kasalukuyang Director for Plans at Chief Supt. Ricardo Quinto ng Police Regional Office (PRO) II ay itinalaga naman pansamantala sa tanggapan ni Chief PNP, ayon kay PNP Spokesman Sr. Supt. Samuel Pagdilao Jr., kaugnay ng nalalapit ng mga itong pagreretiro sa serbisyo. (Joy Cantos)