Kasalukuyang ginagamot sa Mandaluyong Medical Center sanhi ng tinamong saksak sa iba’t ibang bahagi ng katawan ang biktimang si Josephine Salac, kahera at residente ng Kayumanggi St. Brgy. Plainview ng lungsod na ito.
Samantala naaresto naman ang 17-anyos na binatilyong suspect matapos na habulin ng mga kagawad ng barangay na agad sumaklolo sa pangyayari.
Sa ulat, naganap ang insidente dakong ala 1:00 ng madaling araw sa kahabaan ng Sikap St. Brgy. Plainview ng lungsod na ito habang papauwi ang biktima sa kanilang bahay galing sa trabaho nang bigla na lang sumulpot ang suspect buhat sa dilim at agad na hinila ang dalang bag ng una. Subalit nanlaban umano ang biktima at nakipag-agawan ng bag sa suspect dahilan upang maglabas ito ng patalim at undayan ng sunud-sunod na saksak ang babae.
Nang makuha ang pakay na bag ay mabilis na tumakas ang suspect subalit nakita ito ng rumispondeng mga barangay tanod at nagkaroon ng ilang minutong habulan hanggang sa masakote ang una. Kasalukuyang nakapiit ang suspect sa Mandaluyong detention cell habang inihahanda ang kaukulang kaso laban dito. (Edwin Balasa)