Pamilya ng dinukot na Tsinoy, nanahimik na

Hindi na makita o makontak ang may-bahay ng isang negosyanteng Tsinoy na dinukot ng mga armadong kalalakihan nitong Nobyembre 4 sa Brgy. Santolan, Malabon City pagpapakita lamang na tumanggi nang makipagtulungan ang mga ito sa pulisya.

Ayon kay Supt. Wilfredo Ramos, OIC ng Malabon City Police, ilang beses na niyang pinahanap si Gng. Jovita Co, asawa ng dinukot na si Carlos Co, 56 ,pero hindi na ito makita. Inamin ni Ramos na nahihirapan ang kanyang mga tauhan na resolbahin ang kaso matapos na hindi na nga makipag-ugnayan sa kanila ang pamilya ng biktima.

Si Gng. Co ang huling nakausap ng mga abductors gamit ng mga huli ang cellphone ng dinukot na mister ng una. Kinumpirma ni Gng. Co na humihingi ng ransom money ang mga kidnappers kapalit ng kalayaan ng kanyang asawa subalit hindi nagbigay kung magkanong halaga.

Una namang nagpahayag si Gng, Co na posibleng may kinalaman din sa negosyo ang ginawang pagdukot sa kanyang mister bagaman hindi inaalis ng pulisya na kidnap-for-ransom gang ang responsable sa pagdukot sa negosyante na karaniwang umaatake kapag malapit na ang Pasko. (Ellen Fernando)