Kelot na labas-pasok sa kulungan, nagbigti

Isang lalaki na labas-pasok sa kulungan ang winakasan ang sariling buhay habang nasa impluwensiya ng alak sa pamamagitan nang pagbibigti sa loob ng kanilang bahay kahapon ng umaga sa Tondo, Maynila.

Patay na nang idating sa Mary Johnston Hospital ang biktimang si Marvin Biso, ng 1333 Sevilla St., Tondo.

Batay sa ulat ng pulisya dakong alas-7:30 ng umaga nang matagpuan ang biktima na nakabigti gamit ang kurtina ng bahay.

Nabatid na lango sa alak na umuwi ng bahay si Biso at sinita ang isang grupo ng kabataan na nakaistambay sa kanilang lugar kamakalawa ng gabi.

Pinagmumura pa ng suspect ang mga kabataan at narinig na sinabi nito ang katagang "magpapakamatay ako at kapag patay na ako, isusumpa ko kayo".

Hanggang sa kanyang bahay ay sigaw ng sigaw si Biso. Nang tumahimik ito ay agad na dinistrungka ng kanyang mga kaanak ang pinto ng kuwarto na kinandado nito at doon nadiskubre ang pagbibigti nito.

Hindi naman mabatid kung ano talaga ang maaaring motibo sa isinagawang pagbibigti ni Biso. (Danilo Garcia)