Nakilala ang nasawing pulis na si SPO2 Alfredo Calunzo, 51 at misis nitong si Feliza, kapwa nakatira sa Phase 9 Package 7, Block 4, Lot 49 ng Bagong Silang, Caloocan City. Ang mag-asawang Calunzo ay kapwa idineklarang dead-on-arrival (DOA) sa Nodados Hospital sanhi ng maraming tama ng punglo na tinamo sa katawan.
Ayon sa ulat, dakong alas-6 ng gabi papauwi na sa kanilang bahay ang mag-asawa lulan sa isang scooter at habang dumadaan sa may Phase 4 ay biglang sumulpot ang dalawang lalaki na armado ng mga baril.
Walang sabi-sabing pinaulanan ng bala ng baril ang mag-asawa at saka mabilis na tumakas.
Masusi namang tinitingnan ng pulisya kung ano ang motibo sa isinagawang pagpaslang sa mag-asawa kasabay ng isinasagawang manhunt operation laban sa mga suspect. (Ellen Fernando)