3 miyembro ng sindikato sa pekeng dolyar, arestado

Tatlong pinaniniwalaang miyembro ng isang sindikato na gumagawa at nagpapakalat ng pekeng dolyares at tseke ang dinakip ng mga tauhan ng Criminal Investigation and Detection Group (CIDG) sa Malate, Maynila.

Nakilala ang mga suspect na sina Randy Lanuza, 43, ng Sta. Ana, Maynila; Peter Bomediano, 62, ng Muntinlupa at Natividad Castillo, 60 ng Cabanatuan City.

Sa ulat ng CIDG-Manila, nakatanggap sila ng impormasyon buhat kay Arnel Carino na nabiktima ng mga suspect na nagbebenta ng dolyares at travellers cheque sa lungsod.

Dakong alas-5 ng umaga nang magsagawa ng operasyon ang mga operatiba sa may Rajah Sulaiman Park sa Malate sanhi ng pagkakadakip ng tatlong suspect na naaktuhan ang ginagawang pag-aalok ng mga pekeng dolyares kapalit ng mababang halaga sa Peso.

Isinasailalim na ngayon ng pulisya na masusing imbestigahan ang mga suspect upang mabatid kung saan nila kinukuha o ginagawa ang mga pekeng dolyares at tseke at madakip ang mga posibleng kasabwat. (Danilo Garcia)