3 Tsinoy tiklo sa pagpatay

Arestado ang tatlong magkakaanak na Tsinoy matapos na mapatay ang isang lalaki at masugatan naman ang dalawang iba pa sanhi ng tama ng bala ng baril at saksak kamakalawa ng gabi sa Sta. Cruz, Maynila.

Ang mga suspect na sina Joseph, 28; Jayson, 28 at Mario Yu, 27, pawang mga residente ng 1425 Andalucia St. Sta. Cruz, Maynila ay nadakip matapos na mapatay si Francis Francisco, 25 at masugatan sina Joseph Vergara, 28, tricycle driver at Warren Arcega, 15, estudyante. Ginagamot sina Vergara at Arcega sa Jose Reyes Memorial Hospital.

Sa ulat ni Det. Manuel Sarmiento ng MPD-Homicide Section, dakong alas-11 ng gabi nang maganap ang insidente sa panulukan ng Alvarez at Milagros Sts.

Nabatid na binastos ng suspect na si Joseph ang hipag ni Vergara na si Besana ng alukin ng una ang huli na makipagtalik sa kanya. Ikinagalit ito ni Vergara.

Minabuti ng suspect na umalis subalit bumalik ito na armado na ng patalim kung saan inabutan naman nito si Francisco at agad na pinagsasaksak. Umawat si Vergara subalit ito naman ang pinagbalingang saksakin ng suspect.

Sasaklolohan naman si Vergara ni Arcega subalit ito naman ang sinalubong ng putok ng baril ng mga suspect na sina Mario at Jayson.

Tinangka pa ng mga suspect na magtago subalit agad ding nasukol sa Juaning St. Kakasuhan ang mga suspect ng murder at double frustrated murder. (Danilo Garcia)