Cook patay sa sunog

Isang 20-anyos na cook ang nasawi, habang tinatayang aabot sa isang milyong piso ang naabo matapos ang sunog na naganap sa isang food chain na pinaglilingkuran ng una dahil sa pagsabog ng isang tangke ng LPG kahapon ng umaga sa Makati City.

Nakilala ang nasawi na si Efren Valdez na nakulong at na-suffocate sa loob ng Tapa King na matatagpuan sa panulukan ng P. Burgos St. at Makati Avenue ng nabanggit na lungsod.

Tinatayang aabot naman sa P1 milyon ang halaga ng ari-arian na natupok sa sunog.

Ayon sa ulat, naganap ang insidente dakong alas-8:50 ng umaga sa kitchen ng nabanggit na food chain habang nagluluto si Valdez nang biglang sumabog ang tangke ng LPG.

Hindi na nagawa pang makalabas ng biktima dahil sa makapal na usok. Gayunman hindi na nadamay pa ang mga kalapit establisimento nito makaraang maagapan ng mga pamatay-sunog. (Lordeth Bonilla)