Roldan, nahirapang makahanap ng abogado

Muling humingi ng karagdagang 10-araw sa korte ang aktor at dating Quezon City Congressman na si Dennis Roldan upang makahanap ng kanyang abogado matapos na mahirapan itong makahanap ng magtatanggol sa kanya sa kinakaharap nitong kidnapping case.

"I really find difficulty in looking for a new counsel equally skilled, competent, and trustworthy as that of my previous counsels," saad ni Roldan sa kanyang isinumiteng formal request sa Pasig Regional Trial Court, Branch 261 sa sala ni Judge Agnes Reyes Carpio.

Sa kanyang 4-pahinang mosyon, sa kabila ng pagbibigay taning na 10-araw sa kanya ng korte na magtatapos ng Agosto 18 upang kumuha ng kanyang abogado ay muli itong humingi ng karagdagang 10-araw na magtatapos sa Agosto 28.

Matatandaang anim na araw matapos na payagang makapagpiyansa sa kinakaharap na kasong kidnapping sa halagang P500,000 na iginawad ni Judge Carpio ay kusang nilayasan si Roldan, Mitchell Gumabao sa tunay na buhay ng kanyang mga de kalibreng abogado na sina Attys. Segfried Fortun at Carl Arian Castillo.

Hindi naman ipinaliwanag ng dalawang abogado kung bakit nila nilayasan si Roldan.

Si Roldan ay nadidiin bilang mastermind sa pagdukot sa 3-anyos na batang Tsinoy noong Pebrero 9, 2005 sa Ortigas, Pasig City kasama ang iba pa na kasalukuyang nakapiit sa Pasig City Jail matapos na hindi payagan ng korte ang mosyon ng mga ito na makapagpiyansa rin sa nasabing kasong kinakaharap. (Edwin Balasa)