Roldan nakalaya na, PNP nadismaya

Dismayado si PNP chief Director General Oscar Calderon sa pagpapalaya ng korte kahapon ng umaga kay dating Quezon City Congressman at aktor na si Dennis Roldan kaugnay sa kasong kidnap-for-ransom na kinakaharap nito.

Si Roldan, Mitchell Gumabao sa tunay na buhay, ay tuluyan nang nakalaya kahapon matapos na maglagak ng P.5-M piyansa sa sala ni Judge Agnes Reyes-Carpio ng Branch 261 ng Pasig RTC.

Sinabi ni Carpio, na pinahintulutan nilang maglagak ng piyansa si Roldan dahil sa umano’y kakulangan ng prosekusyon na makapagbigay ng malinaw na ebidensiya sa kaso laban sa suspect.

Sa panig ng PNP, sinabi ni Calderon na maghahain sila ng mosyon sa Department of Justice upang ibasura ang desisyon ng korte na makapagpiyansa ito. Iginiit ng PNP chief na siya ring kasalukuyang hepe ng Police Anti-Crime and Emergency Response (PACER) na matibay ang mga nakalap nilang ebidensiya kaugnay sa pagkadukot sa biktimang si Kenshi Yu na noon ay 3-anyos pa lamang. (Joy Cantos)