Huwes na nasentensiyahan, pinasususpinde

Pinasususpinde ng isang piskal sa Supreme Court ang isang huwes matapos na ito ay sintensiyahan ng mababang korte sa dalawang bilang ng kasong child abuse.

Nabatid mula sa liham ni Senior State Prosecutor Emmanuel Velasco kay Supreme Court (SC) Chief Justice Artemio Panganiban, iginiit nito na si Judge Adoracion Angeles ng Caloocan City Regional Trial Court (RTC) ay convicted na sa kasong kriminal sa Quezon City RTC.

Ang kaso ni Angeles ay na-promulgate na noon pang Hulyo 17, 2006.

Inireklamo ni Velasco ang hindi pagkukusa ni Judge Angeles na magbitiw sa pagdinig at pagdedesisyon sa mga kasong kanyang hinahawakan.

Binigyang diin pa ni Velasco na sinumang hukom na hinatulan sa katulad na kasong kinasasangkutan ni Judge Angeles ay marapat lamang na manatili sa piitan tulad ng mga ordinaryong kriminal.

Malaki ang paniniwala ni Velasco na bilang hukom ay may malalim na impluwensiya sa mga ahensiya ng hudikatura si Judge Angeles at ang pansamantalang pagsuspinde sa kanya sa tungkulin ang maaari lamang makapag-neutralize ng sitwasyon. (Grace dela Cruz)