Ipinagpalit ng kasintahan, lalaki nagbigti

Hindi nakayanan ng isang 20-anyos na binata ang sakit sa pagkabigo sa pag-ibig matapos na kitlin nito ang buhay sa pamamagitan ng pagbibigti nang ipagpalit siya sa iba ng kanyang kasintahan, kamakalawa ng gabi sa Tondo, Maynila.

Wala nang buhay nang matagpuang nakabitin ang biktimang nakilalang si Michael Maliwanag, caretaker ng isang bodega sa may 5305 Vargas St., Tondo, Maynila.

Sa ulat ng MPD-Homicide Section, nadiskubre ang bangkay ng biktima dakong alas-9:15 ng gabi ng mga kasamahan niyang si Aling Clarita Andojar sa tinutuluyang bodega. Wala namang iniwang suicide note ang biktima ngunit sa pagtatanong kay Aling Clarita, sinabi nito na naipagtapat sa kanya ng biktima ang sama ng loob nito matapos na hiwalayan siya ng kanyang kasintahan.

Dinamdam umano ng biktima ang pakikipaghiwalay ng kasintahan na sumama sa ibang lalaki sanhi upang magdilim ang pag-iisip ni Maliwanag at nagbunsod sa ginawang pagpapakamatay. (Danilo Garcia)