649 kolorum nasabat ng LTO

Umaabot sa 649 kolorum at out-of line passenger vehicles ang nalambat ng mga elemento ng Land Transportation Office (LTO) nitong nakalipas na buwan ng Mayo ng taong kasalukuyan.

Ito ang iniulat kahapon ni LTO chief Anneli Lontoc kaugnay ng patuloy na kampanya laban sa mga bumibiyaheng kolorum na sasakyan, partikular na sa kahabaan ng EDSA.

Base sa rekord ng LTO, ang naturang bilang ay naitala mula Mayo 4 hanggang Hunyo 7 ng taong kasalukuyan.

Ang naturang operasyon ay isinagawa sa pakikipagtulungan ng LTO Field Enforcement Division (FED) at ng PNP-Traffic Management Group (TMG).

Tuluy-tuloy ito at hindi tayo titigil hanggang hindi nawawala sa lansangan ang mga kolorum na sasakyan. (Angie de la Cruz)