6 Comelec officials kinasuhan ni Lacuna

Nagsampa ng kaso sa korte kamakailan si Manila Vice- mayor Danny Lacuna laban sa anim na election officer ng Comelec sa lungsod upang pigilin ang mga ito sa pagberipika ng mga lagdang nakalap ng grupong ‘Sigaw ng Bayan’ para sa layuning maamyendahan ang Konstitusyon.

Sa kasong iniharap ni Lacuna sa Manila Regional Trial Court hiniling nito sa korte ang pag-iisyu ng temporary restraining order (TRO) at ng isang Writ of Prohibition upang permanenteng mapigilan ang pagsali ng Comelec sa pagtulak sa Chacha sa pamamagitan ng pagberipika sa mga sinasabing lagdang nakalap ng grupo sa iba’t ibang lugar sa Metro Manila.

Ayon kay Lacuna, dahil sa kawalan ng isang sapat na batas na magbibigay ng tama at sapat na alituntunin sa pagbalangkas ng isang people’s initiative, hindi ito maaaring gawin.

Ang pagsagawa ng Comelec ng beripikasyon sa mga sinasabing lagda ayon sa pangkasalukuyang sitwasyon ay pagsasayang lamang ng panahon o kaban ng bayan.