OFW umihi sa pader, inatado

Agad na nasawi ang isang overseas Filipino worker (OFW), habang malubha namang nasugatan ang kasamahan nito makaraang makursunadahan ang mga ito habang umiihi sa isang pader at pagsasaksakin ng isang grupo ng kalalakihan, kahapon ng madaling-araw sa Taguig City.

Namatay noon din sa pinangyarihan ng insidente sanhi ng malulubhang tama ng saksak sa iba’t ibang parte ng katawan ang biktima na si Daniel Quitoriano, 30-anyos at residente ng Santa Ana, Pateros, habang kasalukuyan namang inoobserbahan sa Ospital ng Makati ang kasamahan nito na si Roberto Perin, 26, na residente naman ng Block 108, Lot 6, J. Perfecto St., Barangay Rizal, Makati City.

Isang manhunt operation naman ang kasalukuyang isinasagawa ng pulisya para sa isang grupo ng kalalakihan na agad na tumakas matapos ang isinagawang krimen.

Sa inisyal na imbestigasyon ng pulisya, naganap ang insidente dakong ala-1:30 ng madaling-araw sa Commando Bridge, Taguig City.

Kasalukuyan umanong umiihi sa isang pader ang mga biktima sa nabanggit na lugar nang biglang dumaan ang mga lasing na suspect at agad na pinagtulungang inundayan ng sunud-sunod na saksak ang mga una.

Napuruhan sa maseselang bahagi ng katawan si Quitoriano na naging sanhi ng agarang kamatayan nito, habang si Perin naman ay nagawa pang maisugod sa pagamutan ng ilang mga concerned citizens na nakakita sa nasabing insidente. (Lordeth Bonilla)