9 na highway robbers tugis

Isang malawakang manhunt operation ang isinasagawa ngayon ng pulisya laban sa siyam na kalalakihan na nangholdap sa isang bus ng Philippine Rabbit sa kahabaan ng North Expressway kung saan ilan sa mga ito ay bumaba sa Quezon City.

Ayon sa bus driver na si Rodelio Cabrera, sumakay ang mga suspect sa kanilang terminal sa Angeles City at sa Dau naman nagdeklara ng holdap sa loob ng bus.

Ang mga suspect ay armado ng granada, iba’t ibang kalibre ng baril at patalim.

Sinabi ni Cabrera na hindi naman niya matingnan ang mga mukha ng mga suspect dahil isa sa mga ito ang nagtutok ng baril sa kanyang leeg at inutusan siyang magmaneho na lamang ng bus.

Dito ay kinuha ng mga suspect ang kanilang kita at mga personal na gamit ng may 40 pasahero.

Lumilitaw na nagpaputok din ng baril ang isa sa mga suspect at wala namang naiulat na tinamaan ng baril.

Anim sa mga suspect ay bumaba sa 11th Avenue habang ang iba naman ay nagsibaba sa Balintawak.

Wala namang matukoy pa ang pulisya kung anong grupo ang nagsagawa ng panghoholdap. (Doris Franche)