Fetus, nginatngat ng daga

Halos maubos ang isang fetus nang madiskubreng nginangatngat ng isang daga matapos na matagpuan sa isang basurahan kahapon ng umaga sa Intramuros, Maynila.

Sa ulat ng Manila Police District-Homicide Section, dakong alas-7:30 ng umaga nang madiskubre ang fetus na nakabalot sa isang tela sa basurahan sa kanto ng Arsobispo at Soriano Ave. sa Intramuros, Maynila.

Nabatid na unang nakita ang fetus ng isang basurero habang pinagpipiyestahan ng mga langgam at kinakain ng mga daga ang katawan nito.

Tinatayang nasa pagitan ng tatlo hanggang apat na buwan ang fetus na itinapon ng walang konsensiyang ina. (Danilo Garcia)