Army reservist dedo sa holdap

Isang 36-anyos na Army reservist ang nasawi makaraang barilin ito sa ulo ng isa sa tatlong holdaper na nangholdap sa sinasakyan FX taxi ng una, kamakalawa ng gabi sa Marikina City.

Nakilala ang nasawi na si Ricardo Siuagan, PA reservist at pansamantalang nagtatrabaho sa Ateneo de Manila University bilang maintenance crew, samantala agad namang tumakas ang tatlong armadong suspects matapos makuha ang mahahalagang gamit ng iba pang pasahero at mabaril ang biktima.

Ayon sa pulisya, naganap ang insidente dakong alas-7:05 ng gabi ng sumakay ang mga suspect at nagpanggap na pasahero sa Isuzu Highlander taxi na minamaneho ni Rolly Riego sa harap ng Sta. Lucia Mall sa kahabaan ng Marcos Hi-way.

Habang tinatahak ang F. Fernando sa Brgy. San Roque ay nagpahayag ng holdap ang mga suspect at isa-isang nilimas ang mahahalagang gamit ng mga pasahero.

Nang makita ng isa sa mga suspect na may baril si Siuagan ay mabilis itong binaril ng malapitan sa ulo na naging sanhi ng agaran nitong kamatayan.

Mabilis na nagsitakas ang mga suspect matapos ang isinagawang krimen.

Isang manhunt operation ang inilunsad ng pulisya laban sa mga suspects. (Edwin Balasa)