Batay sa nakalap na impormasyon, dakong alas-4 kamakalawa ng madaling araw nang bawian ng buhay sa Tondo Medical Center sanhi ng mga tama ng bala sa iba’t ibang parte ng katawan ang biktima na si Romy Gahuman, 46-anyos ng Block 12, Area 3, Brgy. Longos, Malabon City.
Hanggang sa isinusulat ang balitang ito ay hindi pa rin matukoy ng pulisya ang pinagtataguan ng suspect na nakilala lamang sa alyas na "Danny Toyo".
Magugunita na si Gahuman ay binaril ng suspect habang ang una ay nagpapahangin sa labas ng kanyang bahay sa nabanggit na lugar noong Disyembre 15, 2005, dakong alas-5 ng hapon.
Nagpahayag naman ng pagkadismaya si Mayor Oreta sa pulisya dahil hanggang sa kasalukuyan ay wala pang magandang kahinatnan sa kaso ng pamamaslang sa biktima at motibo sa pagkakapaslang dito. (Rose Tamayo)