Taxi driver nanlaban sa holdap, kinatay

Tadtad ng saksak sa katawan at laslas ang leeg ng isang taxi driver nang matagpuan sa loob ng kanyang minamanehong taxi, kahapon ng madaling-araw sa Quezon City.

Dead on arrival sa Veterans Memorial Medical Center (VMMC) ang biktimang si Jhun Serafica, 30, driver ng Shellis Taxi na may plakang PWS-906 at residente ng Katarungan St., Mandaluyong City.

Lumitaw sa imbestigasyon na natagpuan ang biktima dakong alas-4:20 ng madaling araw sa loob ng kanyang taxi na nakaparada sa kahabaan ng Road 13, Brgy. Pag-asa, Quezon City.

Malaki ang hinala ng pulisya na posibleng nanlaban ang biktima sa mga humoldap sa kanya.

Isang manhunt operation ang inilunsad ng pulisya laban sa mga suspect. (Doris Franche)