Taxi driver nanlaban sa holdap, ginilitan

Hindi na umabot ng kanyang kaarawan ang isang taxi driver matapos masawi nang gilitan ng leeg at saksakin ng dalawang holdaper matapos na manlaban ang una habang hinoholdap ng mga huli, kahapon ng madaling-araw sa Caloocan City.

Dead-on-the-spot sanhi ng gilit sa leeg at saksak sa katawan si Fernando Jamito, 48, ng Cleopas St., Seminary Road, Bagbag, Novaliches, Quezon City.

Arestado naman sina Danilo Bohol, 21; at Erwin Maing, 21, kapwa ng 653 Moriones Compound, Juan Luna St., Tondo, Manila.

Sa ulat ng pulisya, dakong ala-1:40 ng madaling-araw nang maganap ang insidente sa kahabaan ng North Diversion Road ng nasabing lungsod.

Nabatid na naisakay ng biktima sa pinapasadang Alkotby taxi (TWZ-694) ang mga suspect at pagsapit sa nabanggit na lugar ay agad na tinutukan ng patalim ng mga huli ang driver. Nakakuha naman ng tiyempo ang biktima at agad na sinipa sa dibdib si Bohol na nakasakay sa unahan na naging dahilan upang magkagulo hanggang sa magawang magilitan sa leeg ang driver ni Maing na nakasakay sa likuran.

Hindi pa nasiyahan ay pinagsasaksak pa ng mga suspect ang biktima at bago tumakas ay kinuha ang pera ng driver.

Ilang bystander sa nabanggit na lugar ang nakakita sa pangyayari at agad na hinabol ang dalawang suspect na nang maabutan ay agad na pinagbubugbog bago dinala sa himpilan ng pulisya sina Bohol at Maing. Nabatid na magdiriwang ang biktima ng kanyang kaarawan ngayong araw na ito. (Rose Tamayo)