Parak timbog habang bumibili ng shabu

Isa na namang pulis-Maynila ang naaresto habang nasa aktong bumibili ng ipinagbabawal na gamot o shabu sa isang checkpoint kahapon ng madaling-araw sa Tondo, Maynila.

Si PO3 Guillermo Sardin, 40, nakatalaga sa MPD-Police Community Precint sa V. Mapa, Sta. Mesa, Maynila ay kasalukuyang nakapiit habang inihahanda ang kaukulang kaso laban dito.

Ayon sa ulat, dakong alas-3 ng madaling-araw nang maaresto ang suspect sa panulukan ng Bato at Callejon Sts. sa nasabing lugar.

Nagpapatrulya umano ang mga awtoridad nang maaktuhan nila ang suspect na bumibili ng ipinagbabawal na gamot o shabu.

Hindi na nanlaban pa ang suspect nang arestuhin ng kanyang mga kabaro at nakuha mula sa pag-iingat nito ang isang sachet ng shabu. (Gemma Amargo-Garcia)