Full alert sa MM dineklara

Isinailalim kahapon ni PNP Chief Director General Arturo Lomibao sa ‘full alert’ ang buong puwersa ng pulisya sa Metro Manila habang ‘heightened alert’ naman sa iba pang bahagi ng bansa kaugnay ng inaasahang malawakang rally sa ika-33 taong paggunita sa Batas Militar ngayong araw.

Ayon kay PNP Spokesman Chief Supt. Leopoldo Bataoil, ito’y bilang paghahanda sa inaasahang kaliwa’t kanang kilos-protesta na bantang ibulaga ng mga militanteng grupo at ng mga kalaban ng gobyerno laban kay Pangulong Gloria Macapagal-Arroyo.

Sinabi ni Batoil na dakong alas-6 ng gabi (Martes) ay iniutos na ni Lomibao na ipatupad ang ‘heightened alert’ sa iba pang bahagi ng bansa kasunod naman ng pagdedeklara ng ‘full alert’ kahapon ng tanghali sa Metro Manila.

Ayon naman kay National Capital Region Police Office (NCRPO) Chief Dir. Vidal Querol, ang pagsasailalim niya sa buong puwersa ng kanyang mga tauhan sa ‘full alert’ ay bunsod ng intelligence report na 30,000 raliyista ang magtitipun-tipon sa iba’t ibang bahagi ng Kamaynilaan. (Joy Cantos)