Inatado ng karibal: Lalaki, kritikal

Nasa malubhang kalagayan ngayon ang isang binata nang pagsasaksakin ng kanyang karibal kamakalawa ng hapon sa Marikina City.

Kasalukuyang inoobserbahan sa Amang Rodriguez Medical Center sanhi ng mga saksak sa iba’t ibang bahagi ng katawan ang biktimang si Edwin del Piero, 31 ng No. 46 Lakandula St. Brgy. Parang ng nasabing lungsod.

Agad namang naaresto ng mga pulisya ang suspect na si Norman Evangelista, 23, kapitbahay ng biktima.

Sa ulat ng pulisya, naganap ang insidente dakong alas-4:45 ng hapon sa harap ng bahay ng biktima nang biglang mag-amok ang suspect na lasing at may dalang patalim.

Lumabas ang biktima upang kausapin ang suspect subalit bigla na lamang itong sinugod ng huli at paulit-ulit na sinaksak.

Lumilitaw na magkaribal ang biktima at suspect sa babaeng kanilang nililigawan hanggang sa isagawa ng huli krimen. (Ulat ni Edwin Balasa)