Mandaluyong fire: Ginang patay

Namatay ang isang may kapansanan na ginang, habang sugatan naman ang isang bumbero makaraang matupok ng apoy ang buong apat na palapag ng isang condominium sa Mandaluyong City, kamakalawa ng gabi.

Kinilala ang nasawing biktima na si Adelina Francisco, nakatira sa Room 406 Kasambahay Condominium na matatagpuan sa kanto ng Makaturing at Sacripante Sts., Brgy. Barangka Itaas ng lungsod na ito, habang sugatan naman si SFO3 Ramon Enguerra, ng Mandaluyong Bureau of Fire and Protection.

Nagsimula ang sunog dakong alas-9 ng gabi nang magputukan ang kuryente sa loob ng katabing unit ng nasawing biktima. Agad na kumalat ang apoy.

Nataranta na ang mga residente at nagsipagtakbuhang bumaba, gayunman hindi na nakalabas ng kanyang unit ang ginang dahil sa may sakit at matagal ng nakaratay sa higaan.

Umabot sa Task Force Bravo ang alarma ng sunog na naapula lamang dakong ala-1:12 ng madaling araw. (Ulat ni Edwin Balasa)