Kuya binoga ni bunso

Sabog ang mukha at katawan ng isang technician matapos na barilin ng sumpak ng bunsong kapatid dahil lamang sa hiniram na suplete o panghinang sa Quezon City.

Namatay noon din ang biktima na nakilalang si William Velasco, 44, ng No. 004 Empire Hilltop, Brgy. Payatas-B ng nabanggit na lungsod, habang mabilis namang tumakas ang utol nitong suspect na si Roberto, 42.

Ayon sa imbestigasyon ng pulisya, naganap ang insidente dakong ala-1:30 ng hapon sa loob ng tahanan ng biktima.

Sinita umano ng biktima ang bunsong kapatid tungkol sa hindi pagbabalik ng hiniram na panghinang.

Minasama at ikinagalit ng suspect ang pagsita ng kapatid hanggang sa magkaroon ng mainitang pagtatalo. Biglang inilabas ng suspect ang dalang sumpak pinaputok ng tatlong ulit sa kanyang kuya na naging dahilan ng kamatayan ng huli.

Isang manhunt operation na ang inilunsad ng pulisya laban sa tumakas na suspect. (Doris Franche)