Shell papapanagutin sa tank blast

Papapanagutin ng Quezon City government at ng Department of Environment and Natural Resources (DENR) ang Shell Philippines kaugnay ng naganap na pagsabog ng isang gas tanker nito na ikinasugat ng marami at ikinasira ng tahanan ng mahigit sa 100 residente ng Don Antonio Heights sa may Commonwealth Ave. sa nabanggit na lungsod nitong nakalipas na linggo.

Kaugnay nito, inihahanda na ng QC-Bureau of Fire Department ang kasong reckless imprudence resulting to multiple damage to properties at multiple serious physical injuries laban sa Shell Philippines.

Ayon kay QC Councilor Ariel Inton, bubuo siya ng isang local bill upang agarang maparusahan ang mga taong nasa likod ng ganitong uri ng pagsabog.

Bunsod anya ng hindi malinaw na batas na nagpaparusa sa mga ganitong insidente, hindi nabibigyan ng hustisya ang mga naapektuhan nito.

Sa panig naman ng DENR, sinabi ni Secretary Mike Defensor na pina-iimbestigahan na niya ang naganap na insidente.

Lalapatan din nila ng kaukulang parusa ang nabanggit na kumpanya kapag mapatunayan na may ginawa itong paglabag sa environmental rules. (Ulat ni Angie Dela Cruz)