Transport strike ikinasa

Handang-handa na at nakakasa na ang isasagawang malawakang welga ng transport groups sa susunod na linggo dahil sa inaasahang implementasyon ng Expanded Value Added Tax (EVAT).

Ang naturang strike ay pangungunahan ng Pinagkaisang Samahan ng mga Tsuper at Operators Nationwide (PISTON), gayundin ng Philippine Confederation of Drivers and Operators-Allianced of Concerned Transport Organization (PCDO-ACTO).

Sa isang telephone interview, nagkakaisang sinabi nina Mar Garvida-National President ng PISTON at Efren de Luna, ng PCDO ACTO kasado na ang gagawin nilang nationwide strike sa nabanggit na araw bilang matinding protesta sa pagpapatupad sa EVAT.

Nabatid pa sa dalawa na nakarating na sa kanilang kaalaman na sa susunod na linggo ay magpapalabas na ng desisyon ang Korte Suprema na mag-aalis na sa temporary restraining order (TRO) para tuluyang mapa-implementa ang EVAT law.

"Pagna-lift na ang TRO sa EVAT, tiyak agad na tatlong piso ang itataas sa halaga ng gasolina na lubha na namang magpapahirap sa amin at sa publiko," dagdag pa ni Garvida.

Nanawagan din ang mga naturang transport leader na sa halip na ipatupad ang pahirap na EVAT ay dapat na gawing prayoridad ng pamahalaan ang pagbibigay ng magandang serbisyo sa taumbayan at hindi puro usaping pulitika na lamang ang pinagkakaabalahan. (Ulat ni Angie Dela Cruz)