Shabu chemical nasamsam

Labing-walong drum ng ethir, isang uri ng chemical na hinihinalang hinahalo sa paggawa ng shabu ang nadiskubre ng pulisya mula sa bahay ng isang Taiwanese national habang nagsasagawa ang mga ito ng isang routine check-up sa isang subdivision sa Parañaque City kamakalawa.

Sa report na natanggap ni Parañaque City Chief of Police, Supt. Ronald Estilles, sa pagitan ng alas-4 at alas-5 ng hapon, nadiskubre ang naturang mga kemikal sa #8 Saint Jude St., Multinational Village, Brgy. Moonwalk, ng lungsod na ito na pag-aari ni Li Chu Wang, habang nagsasagawa ng routine check-up sa naturang lugar.

Nabatid na ang ethir ay isang uri ng kemikal na hinahalo sa paggawa ng shampoo at nail polish. Napag-alaman pa rin na ang 18 drum ng ethir ay hindi pa kinukumpiska ng mga pulis kung saan naroon pa rin ito sa naturang bahay. Hindi nadatnan si Wang sa bahay.

Matatandaan na ang naturang subdivision ay ilang ulit nang sinalakay ng mga awtoridad dahil sa sunud-sunod na shabu laboratory na nadiskubre rito. (Ulat ni Lordeth Bonilla)