2 bitay sa amang pumaslang sa 2 anak

Hinatulan kahapon ng dalawang ulit na kamatayan ang isang ama na pumaslang sa dalawang paslit niyang anak noong nakalipas na Disyembre, 1998.

Sa limang-pahinang desisyon na ipinalabas ni Manila Regional Trial Court (RTC) Judge Silvino Pampilo Jr., ang hinatulan ng dalawang bitay ay si Honorio Tibon kaugnay sa pagpaslang niya sa kanyang dalawang anak na sina Kenjits, 2; at Albert, 3; sa loob ng kanilang bahay.

Tinadtad ng saksak sa katawan ng akusado ang kanyang dalawang anak makaraang matuklasan na ang kanyang live-in partner na si Gina Sumangit, isang domestic helper sa Hong Kong at ina ng dalawang bata ay may ibang kinakasama.

Mahimbing noong natutulog ang dalawang bata nang kanya itong pagsasaksakin bilang paghihiganti sa ina ng mga ito.

Ibinasura ng korte ang naging depensa ni Tibon na wala sa katinuan ng pag-iisip nang isagawa niya ang krimen. (Ulat nina Andi Garcia at Grace Dela Cruz)