2 biktima ng salvage natagpuan

Dalawang lalaki na pinaniniwalaang biktima ng salvage ang natagpuan sa isang bakante at madamong lote sa Muntinlupa, kamakalawa.

Inaalam pa ng pulisya ang pagkakakilanlan sa mga biktima na kapwa naagnas na at nakagapos ang mga kamay at paa.

Ang unang biktima ay nakasuot ng puting t-shirt, light blue na shorts, 5’7 talampakan ang taas, habang ang isa pa ay nakasuot ng kulay yellow na t-shirt, asul na short pants, 5’6 talampakan ang taas at kapwa tinatayang nasa gulang na 40-anyos.

Sa ulat ng pulisya natagpuan ang mga biktima dakong alas-3 ng hapon sa may Victoria Road, Victoria Subdivision, Brgy. Tunasan, Muntinlupa City.

Halos bumaligtad ang sikmura ni Ariel del Rosario, 14, nang malanghap ang mabahong amoy at ng kanyang tuntunin ang pinanggagalingan ay doon nito nakita ang dalawang naaagnas na bangkay ng mga biktima.

Inaalam pa ng pulisya kung pinagbabaril ba o pinagsasaksak ang dalawang lalaking pinaniniwalaang biktima ng salvage. (Ulat ni Lordeth Bonilla)