P131-M shabu nasamsam

Umaabot sa 65 kilo ng shabu at 20 sako ng ephedrine ang nasamsam ng mga tauhan ng Philippine National Police-Anti Illegal Drugs Task Force makaraang sabay-sabay na salakayin ang tatlong bahay sa Brgy. West Triangle sa Quezon City, kahapon ng hapon.

Anim katao na hindi muna ibinigay ang pangalan ang sinasabing naaresto rin sa naturang operasyon.

Nabatid na ang raid ay isinagawa sa bisa ng search warrant na inisyu ni QC Executive Judge Natividad Dizon sa mga bahay sa No. 12 -B Liwayway St., na pag-aari ni Peter Ngo; sa 19-C Bulletin St. na pag-aari umano ni Mey Ching Ka Yo at sa Rest Haven St., na pag-aari naman ni Jimmy Chang, pawang nasasakupan ng brgy. West Triangle, Quezon City.

Ayon kay PNP- Anti Illegal Drugs Task Force chief Deputy Director General Ricardo de Leon na aabot sa P131 milyon ang halaga ng mga nakuhang illegal drugs sa sinalakay na tatlong bahay.

Nabatid na matagal nang minamanmanan ang tatlong bahay dahil sa umano’y ginagawa itong shabu lab ng ilang drug syndicate. (Ulat ni Doris Franche)