Garci hinahanap na ng NBI

Inumpisahan nang hanapin ng National Bureau of Investigation (NBI) si Election Commissioner Virgilio Garcillano matapos na ipadala sa kanila ng Kongreso ang subpoena para rito.

Sinabi ni NBI Director Reynaldo Wycoco na kalakip ang subpoena ng isang liham buhat sa limang komite ng Kongreso na nagsasagawa ng inquiry ukol sa wiretapping.

Hinihiling ng Kongreso sa NBI na tumulong upang matunton si Garcillano para humarap ito sa kanilang pagdinig.

Muling magsasagawa ng pagdinig ang Kongreso sa Agosto 3 kung saan iginiit nila na kailangan nang humarap si Garcillano para malinawan na ang maraming katanungan ukol sa kontrobersiyal na "Hello Garci tape".

Nilinaw naman ni Wycoco na wala pang warrant of arrest na ipinapalabas kay Garcillano maging kay dating NBI Deputy Director Samuel Ong kaya hindi pa ito wanted sa batas.

Makikipagtulungan naman ang NBI sa Philippine National Police (PNP) upang matukoy ang kinaroroonan ni Garcillano na una nang naiulat na nakalabas na ng bansa. (Ulat ni Danilo Garcia)