Supervisor huli sa tupada

Patung-patong na kaso ang kinakaharap ngayon ng isang supervisor ng security agency matapos na mahuli sa tupada at mahulihan ng baril kahapon ng umaga sa Malabon City.

Bukod sa kasong illegal gambling, nahaharap din sa kasong illegal possession of firearm si Johnny Tubat, 44, ng San Pablo Detective and Protective Agency at residente ng 39 Mabolo St., Malabon City. Kinasuhan din ang kasama nitong guwardiya na si Pangoda Grande, 56.

Ayon kay Supt. Moises Guevarra, hepe ng Malabon City Police, dakong alas-10:30 ng umaga nang maaresto ang dalawa sa Kaingin, Tinajeros, Malabon.

Lumilitaw na nakatanggap ng impormasyon ang pulisya na may nagaganap na tupadahan sa lugar. Agad nila itong tinungo at nahuli sa akto ang dalawa habang nakatakas ang iba.

Nabigo ding ipakita ni Tubat ang papel ng kanyang baril nang makapkapan ng mga awtoridad. (Rose Tamayo)