4 hinatulan ng habambuhay

Habambuhay na pagkabilanggo ang inihatol ng Manila Ragional Trial Court sa apat na miyembro ng "Dos Pares Gang" matapos na mapatunayang nagkasala ng pagpatay sa isang lalaki walong taon na ang nakararaan sa Sta. Mesa, Maynila.

Bukod sa habambuhay na pagkakakulong, pinagbabayad din ni Judge Myra Garcia Fernandez ang mga akusadong sina Jonathan Dequito, Alex Fernandez, Pablo "Sammy" Arguilles at Ariel Damo ng halagang P134,000 bilang danyos sa pamilya ng biktimang si Arturo Diaz ng 392 Parcel St. Sta. Mesa.

Batay sa record ng korte, naganap ang insidente noong Abril 27, 1997 nang pagtulungang bugbugin at saksakin hanggang sa mapatay ng mga suspect ang biktima habang umiihi sa Parcel St.

Positibong itinuro ng saksing si Rebecca Gilhang ang mga suspect na bumugbog at sumaksak sa biktima. (Ulat ni Gemma Amargo-Garcia)