2 paslit courier ng sindikato ng droga

Naaresto ng mga kagawad ng Western Police District (WPD)-Station 3 ang dalawang menor-de-edad na katao matapos na mahulihan ng ipinagbabawal na gamot na nakatakdang ideliber sa isang kostumer sa Quiapo, Manila kamakalawa ng gabi

Nakatakdang dalhin sa Department of Social Welfare and Development (DSWD) ang mga suspect na itinago sa pangalang Gina, 12; at James, 14

Sa report ng pulisya, dakong alas-7 ng gabi nang maaresto ang dalawang menor-de-edad sa Carlos Palanca St., ng naturang lugar

Nabatid na naglalakad ang dalawang suspect nang tiningnan ito ni PO3 Jordan Villanueva nang biglang kumaripas ng takbo

Naghinala si Villanueva na may itinatago ang dalawa kaya inaresto ang mga ito kung saan natuklasan ng una na nag-iingat ng ipinagbabawal na gamot ang mga paslit

Sa presinto, inutusan lamang umano sila ng isang lalaki na dalhin ito sa isang kostumer sa Quinta market sa Quiapo kapalit ng kaunting halaga

Gayunman, ayaw namang sabihin ng mga bata ang pagkakakilanlan ng nag-utos sa kanila at maging ang taong pagdadalhan. (Ulat ni Gemma Amargo-Garcia)