Panibagong revamp sa PNP, nakaamba

Nagbabadya ang panibagong bugso ng malawakang revamp sa liderato ng PNP kaugnay ng pagreretiro ng ilang senior officers sa taong ito.

Sa pagreretiro ni Deputy Director Reynaldo Velasco sa Mayo 22 ay inaasahang papalit sa puwesto nito si Deputy Director Gen. Oscar Calderon bilang PNP Chief for Administration.

Samantala, nakahanay naman si NCRPO chief Deputy Director Gen. Avelino Razon Jr. bilang chief ng Directorial Staff, habang si Director Simeon Dizon ang ipapalit kay Director Robert Delfin bilang hepe ng Directorate for Intelligence.

Nakalinya naman bilang Directorate for Personnel and Record Management si Chief Supt. Rodolfo Tor at si Police Regional Office (PRO) 9 director Vidal Querol ang inirekomendang ipapalit kay Razon sa NCRPO.

Sa district level naman ay dalawa ang napipisil na uupo bilang Director ng Central Police District na kinabibilangan ni PNP Spokesman Sr. Supt. Leopoldo Bataoil at si Sr. Supt. Magtanggol Gatdula, habang sina Sr. Supt. Prudencio Reyes at Sr. Supt. Raul Gonzales ang pinagpipilian sa puwesto ng SPDC at NPDC chief.

Samantala, matunog naman sina Chief Supt. Edgardo Doromal para mapunta sa Region 5; sa Region 11 si Chief Supt. Antonio Billiones at sa Region 12 ay si Chief Supt. Wilfredo Garcia.

Nabatid na si Sr. Supt. Samuel Pagdilao naman ang inaasahang hahalili kay Bataoil bilang Public Information Office (PIO) chief at si Sr. Supt. Napoleon delos Santos bilang hepe ng PNP Community Relations Group.

Pirma na lamang ni Pangulong Arroyo ang hinihintay para maipatupad ito. (Ulat ni Joy Cantos)