Truck vs motorcycle: 1 patay, 1 sugatan

Patay ang isang 18-anyos na dalaga, samantalang malubha namang nasugatan ang kasama nito makaraang masagi ng rumaragasang truck ang sinasakyan nilang motorsiklo, kahapon ng madaling araw sa Marikina City.

Namatay noon din ang biktimang nakilalang si Kim Cameron Greychen Garcia, estudyante at residente ng Cepeda St., Brgy. Concepcion 1 ng nasabing lungsod, samantala nasa kritikal namang kondisyon sa Amang Rodriguez Medical Center ang kasama nitong si Alexis Cruz, 21, na nagtamo ng bali sa iba’t ibang bahagi ng katawan.

Ayon sa pulisya, naganap ang insidente dakong alas-2:30 ng madaling-araw sa kanto ng Boni Avenue at Marcos Hi-way, Brgy. Barangka ng nabanggit na lungsod.

Kasalukuyang sakay sa kulay asul na Nexus Motorcycle ang mga biktima galing sa isang party ng bigla na lang silang sabayan ng isang humahagibis na truck at nasagi ang mga biktima.

Sa lakas ng pagkasagi ay tumilapon si Garcia at una ang ulong bumagsak sa kalsada na naging sanhi ng agaran nitong kamatayan.

Nagsasagawa naman ng manhunt operation ang pulisya sa pagkakaaresto sa suspect na mabilis na tumakas matapos ang insidente. (Ulat ni Edwin Balasa)