2 utak sa pamemeke ng pera, tiklo

Arestado ang dalawang katao na nagpapakalat ng pekeng pera nang magsagawa ng magkasanib na operasyon ang Criminal Investigation and Detection Group (CIDG), District Police and Intelligence Unit (DPIU) at Bangko Sentral kahapon ng umaga sa Valenzuela City.

Sa bisa ng search warrant, naaresto sina Tony Espeleta, 42, welder at Jabiguero Rodolfo, alyas Intoy, tricycle driver kapwa residente ng Brgy. Bitik, Gen. T. de Leon, Valenzuela City.

Sa ulat ng pulisya, dakong alas-8 ng umaga nang maaresto ang mga suspect sa kanilang bahay habang dala-dala ang 40 piraso ng P500 bill; 45 piraso ng P50 bill at 20 piraso ng P200 bill.

Nabatid na bago naganap ang insidente, may natanggap na impormasyon ang mga awtoridad laban sa pagkalat ng pera ng mga suspect sa Caloocan, Malabon, Navotas at Valenzuela.

Lumilitaw din na may isang taon na ang ilegal na operasyon ng mga suspect dahil umabot na din sa Cavite at Laguna ang pagpapakalat ng pekeng pera.

Kadalasan umanong ibinebenta ng mga suspect ang mga pekeng pera sa mga taxi driver.

Bunga nito, pinag-iingat ng pulisya ang publiko laban sa pagkalat ng mga pekeng pera. (Ulat nina Rose Tamayo at Angie dela Cruz)